افغانستان ليك تورك لر فرهنگی فدراسيونی قوريليشی اوچون پيام
بسم الله الرحمن الرحيم
معلوم كيم عزيز اولكه ميز افغانستان ده باشقه مليت لر قطاريده تورك ملتيگه منسوب اوزبيكلر ، توركمن لر ،قزاق لر قرغز لر ، ايماق لر و اوشبو بويوك ملتگه تيگيشلی خلق لريشيب بير - بيرلری بيلن ايناقليك ده حيات كيچريب كيلماقده . ديمك بولر افغانستان نينگ افتخارلی تاريخی آقيم لريده باش لريدن اوتكزگن و كيچرگن تورلی حادثه لر و واقعه لرده يانمه يان تورگن لريگه تاريخ هميشه گواه دير .هه !
حقيقت نی آيتگنده تورك ملتی اوزاق اوتميش وتاريخ گه ايگه دير . بولرنينگ قلمروی يلغوز افغانستان ، ايران ، اورته آسيا ، عراق ، حاضرگی توركيه ، هندوستان و چين گه تقه ليب قالمی ، بلكه دنيانينگ كوپراق منطقه لری ده حكم سوريب اوزلريدن منگو و ابدی آت ، اونوتيلمس خاطره و اوچمس يادگارليك لر قالديرگن لريگه برچه ميز شاهد ميز .
قنده ی ديگنده حضرت اميرالكلام نظام الدين امير عليشير نوائی ، ابوعلی ابن سينا ، ابوريحان البیرونی ،
فارابی ، مولانا جلال الدين محمد بلخی ، نظامی گنجوی ، اميرخسروبلخی ، دهلوی ، لطفی هروی ، سكاكی ، اتائی ، ابولمعانی ميرزا عبدالقادر بيدل ، محمود الكاشغری ، قلم و قليچ ايگه سی ظهيرالدين محمد بابر و نظامی ساحه لرده آتيلا ، امير تيمور صاحبقران ، افراسياب ، سلطان حسين ميرزا بايقرا ، شاه رخ ميرزا ، شاه جهان ، الوغ بيگ ميرزا ، ابولقاسم بابر ، فرقت و يوزلرچه علمی ، ادبی ، تاريخی و دينی بويوك شخصيت لردن آت توتيش ممكن .
منه بوكون تورك بويوك ملتيگه قره شلی بيليم لی و دانشمند شخصيت لر وجانكوير وملت سيور اولكه داشلريميزدن جسمآ اوزاق توشكن ايل سيور قرداش لريميز چيت ايل ، يعنی هالند تيلبوگ شهريده كته و اولكن بيرايش ، يعنی “افغانستانليك توركلر فدراسيونی نينگ” قوريب ، اوشبو يولدن بوتون دنيا توركلری اينيقسه افغانستان ليك تورك لرينينگ بای تاريخی ، ادبياتی و مدنيتی نی تانيتشاوچون كته آديم كوترگن لری مقتاوگه سزاوار ، توصيف گه لايق ومدح گه قابل دير .
مين اوشبو پيام آرقه لی بو ايزگو اقدام وفايده لی ايش نی برينچيده فدراسيون اساسچی سی دانشمند و بيليم لی شخصيت حرمتلی داكتر همت فاريابی همده اوشبو فدراسيون باشقه علمی ، ادبی وناملی عضولری وياردمچی لری ، قاله و يرسه بوتون جهان تورك لری ، اينقسه افغانستان ليك تورك لريگه چين قلبيم دن قوتلوق بولسين ديب اساسچی لرنينگ بونده ی ايزگوا ايشلريگه ، اولوغ تينگری تعالی تابوغيدن اولكن ظفرلر و كته دن كته موفقيت لر تيله يمن .
مين اداغده اوشبو فدراسيون آرقه لی باشقه بنيادی ايشلر يانباشيده ، تورك لر بويوك ملتيگه عايد ادبی ، تاريخی ، علمی اثرلر همده شعری توپلم لر و بديعی كتابلرباسيلب چيقيشی نی ايسته يمن .
ومن الله التوفيق
۲۰ حمل ، ۱۳۸۷ - ييل
غلام سخی وكيل زاده ( يورتداش )
كابل شهری ، افغانستان
Geen opmerkingen:
Een reactie posten