پيام محترم محمد همايون خيری به مناسبت تآسيس فدراسيون فرهنگی

محمد همایون خیری ، سیوینچ یازی سی پیغامی

02.06.2008- ترکیه ، انقره
حرمتلی داکتر همت فاریابی و بشقه آرقه داشلری گه !
السلام وعلیکم ورحمت الله برکاته،
« افغانستانلی تورک لر مدنی فدراسیونی » نینگ قوریلیشی مناسبتی اوچون اوز صمیمی و یوره ک دن بولگن هیجان وخوش لیگیم نی ، افغانستان اوزبیک وترکمن تیللر نینگ یوکسلتیریش ( قویاش) مدنی مؤسسه سی نینگ آتی دن، سیزگه وحرمتلی یاردمچی لرینگیز، ایش وکوره ش مجادله چی آرقه داشلرینگیز و او ییرده کی بشقه عزیزومحترم قرینداش لریم گ بیلدر ماغچین من /
حرمتلی داکترصاحب کوب یخشی وبا مسمی اسم نی اوزینگیزگه تنله ب آلیب سیز!
حافظ حضرتلرینی سوزی ایسیم گه کیلدی:
«همتم بدرقه راه کن ای طایر قدس ، که دراز است ره مقصدومن نوسفرم/»
ینه میمنه ده بیرنچی عصری مکتب نی قوروچی سی ، رحمتلی میر احمد قلیخان راجی ، میمنه نینگ صون مستقل حاکمی میر دلاور خان اوغلی ، مکتب نی اسمی نی هم « همت » قویوب شونداغ دیگن اکن لر:
«همتینگ بولسه اگر بو مکتب همت ده کیل،»
«خدمتینگ نی ضایع ایتمس حق بوسوز نی یخشی بیل/»
بو حقده ، او بیوک لرنینگ سوزلری طوغری بیر اصابت بولسه کیره ک ؛ اولر ایتگن دیک؛همت یولداشینگیز بولسین ! چونکه منزل اوزاق وسیزهم سفر نینگ باشی ده سیز/
الله تعالی همتینگیزنی ارتتیرسین ، باش ده سیز، بویولده بولگن بشقه همه جسارتلی معنوی ومادی کوچ صاجبلری بولگن یولداش و مقدس مبارزه ارقه داش لرینگیز گه تبریک لر بولسین ! حقیقتاً هم اینگ یخشی زمان ده ؛ اینگ جدی ولازم بولگن قدم نی قویدینگیزلر/
مین هم اخیر ده عین شو نتیجه گه ایتیشوب کیلدیم که فقط وفقط ملتیمیز نینگ قورتولیش یولی ؛ فرهنگی ومدنی بیر مجادله وکوره ش نی ؛ بیلینچ لی و اساسی بیر شکل ده باشلنماغی وبو طوغرو ده جدی بیرینچی لیک گه صاحب بولگن قدم لرنی یخشی گینه تانیب ، تثبیت ایتکن دن صونگره کوتر ماغ کیره ک/
یشه یدیگان کونلریمیزده ، نظامی و عسکری مجادله وکوره ش دن هم کیین قالمه دیک ، بلکه آرتیقچه راغ هم قدم قویدیک ، جدی جسارت کورساتدیک!
نیمه کمچیلیک بار ایدی ؟…….
نیمه گه بیجره آلمه دیک ؟……..
بیجره آلگن بولسک ، او حالده ینه نیمه قیلماغیمیز کیره ک ؟…….
مونگه اوخشش مینگلرچه جواب سیز سوال لریمیز بار که، بیریمیز- بیریمزدن سوره ماغی میز لازم کورینه دی و همه سی گه اورتاق واینگ حقیقت گه یقین جواب چیقرماغیمیز لازم بوله دی /
منه شو وظیفه نی بیجرماغ ؛ شوندی بیر فدراسیون نی وظیفه سی بولسه کیره ک دیب توشونه من /
عزیز دوست لر !
بیر ملت اوچون هم سیاسی ، هم نظامی وهم مدنی وفرهنگی کوره ش یوروتماغی لازم دیر / آرتیق بودرس نی تاریخ دن آلگنی میز بولسه کیره ک / اما اینگ مهم کوره ش ،بیز لر اوچون فرهنگی مجادله دیر/
نیمه گه بولگنی هم همه میز گه معلوم /
تاریخی جسارتلریمیز نی ، فرهنگی و سیاسی تعقل ، و آته بابا میزدن میراث آلگن ذکا بیرلن کوچلنتیره آلسک ، دنیاده بشقه بیز لرگه حریف بولماغگه جرئت قیلیاتگن آز بولسه کیره ک/
عزیز دوست لر ، گپ لر و درد لر کوپ / بشقه زمان اوزون - اوزون دردلشه میز،حاضر بولسه سیز لرگه بومقدس یولگه چیقگن لرینگیز اوچون الله تعالی دن بشره لر تیلب اوز باغلی لیگیم نی کوچیم ییتگینچه سی نی ، سیز لرگه بیلدیره من / کوچ، بیرلشماغده دیر؛ تیک کیشی کوچلی بوله المیدی دیگان اکن لر بیوک لریمیز/
انترنت ده کی صحیفه نگیز نی باش دن ایاغ گه چه اوقیب چیقدیم، نهایت خرسند لیگم گه سبب بولدی ، بیوک لردن ایشیت گن ایدیم ، بیر دعوا نی ، شعری بولمسه ؛ فریادی بولمسه ؛ داستانی بولمسه ؛ اخباری و سیس چیقریاتگان وسیله سی بولمسه ، او دعوا نی اوزی یاغ دیمک دیر /
خدا گه مینگ لرچه شکر بولسین ، بو دعوا آرتیق یلغوز بیر آرزو و ایستک ایمس ؛ بیر حقیقت وبیر حقیقی کوچ دیمک دیر/
تمنی لریمنی سونگی ده رحمتلی استاد ابوالخیر خیری حضرتلرینینگ بیر دردلی آرزو لری نی سیز گه یازه من ؛ یریم چاغ دن آلدین سویلنگن بولیشی ممکن:
تحسر
بار مو بیرکون دوستلر، کیم سیز هم ارشاد اولسنگیز
دهر ارا، حر تانلیب ، بیر ملت ایجاد اولسنگیز
جانلریم ، کیلرمو شونداغ کون که اویقو دن توروب
چوری لیکدن ایریلوب ، قل لیک دن آزاد اولسنگیز
سیز نی تنگریمدن موفق ایسته یوب درگاهی دن
التماسیم دور که مینگ مینگ لرگه استاد اولسنگیز
آنه تیل بیرله یوره ک سیوگی سننگ قرداش لره
یازه یازه هر بیرینگ یازمکده معتاد اولسنگیز
عرقینگیز بیرله تلینگیز نی اولومدن قوتقاریب
عرقلر یاننده فخر ایلاب کونگل شاد اولسنگیز
گر بوتیل تیل بولماسه تیلانگ مونی ، پشتو لشینگ
بولمسه شک یوق که نادان لیک له برباد اولسنگیز
اوقومق ، یازمق ایله هرتیل قالور عزت بیلن
سعی ایتینک عزت بیلن سیزهم قلمداد اولسنگیز
اوز تیلینگیر بیرله یازینگ خیری گه اوخشاب مدام
بیر بیراو غه نامه لر تا تورک دن یاد اولسنگیز
هرات 1327

سیزلرنی الله تعالی گه تاپشره من ، همایون خیری
ترکیه نینگ سیسی رادیو سی
افغانستان مسه سی
انقره - ترکیه